जाजरकोट, मंगलबार, ५ मङ्सिर २०८० । नेपाली कांग्रेसका नेता प्रदीप पौडेलको नेतृत्वमा भूकम्प प्रभावित जिल्लामा अस्थायी टहरा निर्माणको काम सुरु भएको छ । नेता पौडेलको नेतृत्वमा सोमबार जाजरकोट पुगेको युवाको टोलीले मंगलबार नलगाड नगरपालिकाको ५ नम्बर वडाको रघुनाथ टोलबाट अस्थायी आवास निर्माणको काम सुरु भएको हो ।
“५० जना हामी काठमाडौंबाट आएका छौँ । थप १०० जना यहाँबाट थपेर काम सुरु भएको छ । हेरौँ, दैनिक कतिवटा निर्माण गर्न सम्भव हुन्छ,” नेता पौडेलले भन्नुभयो, “सुरुआत नलगाड नगरपालिकाको वडा नम्बर ५ स्थित रघुनाथ टोलबाट गरेका छौँ । भत्किएका संरचना हटाएर अस्थायी आवास निर्माण गर्नुपर्ने हुँदा एकैदिन धेरैवटा बनाउन सकिने देखिएको छैन ।”
नेता पौडेलले अस्थायी आवाससमेत नहुँदा सुत्केरी र वृद्धवृद्धा बिरामी पर्न थालेका पाइएको भन्दै त्यस्तो समस्या भएका परिवारलाई प्राथमिकतामा राखेर अस्थायी आवास निर्माण हुने बताउनु भयो । कांग्रेसका महासमिति सदस्य सुशील भट्टले कांग्रेसले बनाउने एक हजार अस्थायी आवासमध्ये १०० अस्थायी आवास पौडेलको नेतृत्वमा पूरा हुने बताउनु भयो ।
“हामी बढीमा पाँच दिनमा १०० अस्थायी आवास निर्माण गरेर भूकम्पपीडितलाई छानोमुनि बनाउने अभियानमा छौँ,” भट्टले भन्नुभयो, “१०० अस्थायी आवास निर्माणपछि हाम्रो टोली अर्को टोलीलाई जिम्मेवारी हस्तान्तरण गरेर काठमाडौं फर्कनेछौँ ।”
