आइपीएम फ्लोअप

पर्यटनमन्त्री श्रेष्ठसँग इटालीका टिभी पत्रकार तथा टुर अपरेटरको भेट

काठमाडौँ, १८ भाद्र २०७९ । संस्कृति, पर्यटन तथा नागरिक उड्डयनमन्त्री जीवनराम श्रेष्ठसँग युरोपेली राष्ट्र इटालीका टेलिभिजन पत्रकार तथा टुर अपरेटरहरुले भेट गरी नेपालबारे इटालीमा प्रवर्द्धनात्मक अभियान चलाउने प्रतिवद्धता जनाएका छन् ।

शुक्रबार मन्त्रालयमा भएको भेटमा इटालीको ट्राभल टिभीका प्रोड्युसर, वृतचित्र निर्माता तथा टुर अपरेटरहरुले मन्त्री श्रेष्ठसँग नेपालबारेइटाली मा प्रचार प्रसार गर्न इच्छुक रहेको बताएका हुन् ।

नेपालको प्राकृतिक तथा सांस्कृतिक विविधता विश्वभर चिनाउन र विभिन्न रमणीय ठाउँहरुप्रति विदेशी पर्यटकको आकर्षण बढाउन नेपालबारे नि:शुल्क रुपमा वृतचित्र तथा टेलिभिजन कार्यक्रम निर्माण गर्ने उनीहरुको भनाइ थियो ।

नेपालबाट इटालीको सीधा उडान नहुनु तथा दुतावास नहुँदा नेपाल आउन चाहने इटालियन पर्यटकलाई असुविधा भएको समेत उनीहरुको भनाइ छ ।

इटाली तथा मोरक्कोमा पर्यटन व्यवसाय सञ्चालन गर्दै आएका ब्रुनो अलेगीले नेपालबारे इटालीमा प्रवर्द्धनात्मक अभियान चलाउन आफुले सहयोग गर्ने बताउनुभयो । टेलिभिजन कार्यक्रम निर्माता उबाल्डो पेट्रोसिनोले इटालीको स्थानीय भाषामा सन्देशहरु निर्माण गरी नेपालबारे प्रवर्द्धन गर्ने बताउनुभयो ।

मन्त्री श्रेष्ठले नेपाल पर्यटकीय दृष्टिकोणले निकै सम्भावनायुक्त रहेको बताउनुहुँदै पर्यटकका लागि नेपाल बाह्रै महिना घुम्न उपयुक्त मुलुक रहेको बताउनुभयो । नेपाल पर्वतीय पर्यटनका लागि मात्र नभएर प्राकृतिक सुन्दरता, सम्पदा, जातीय तथा जैविक विविधता जस्ता कारणले बाह्रै महिना पर्यटनका लागि योग्य छ भन्ने सन्देश विश्व बजारमा प्रवाह गर्न लागिएको मन्त्री श्रेष्ठको भनाइ छ ।

ट्राभल टिभीका प्रोड्युसर, वृतचित्र निर्माता तथा टुर अपरेटरहरुले इटालीको स्थानीय भाषामा भिडियो सन्देशहरु निर्माणका लागिनेपालका विभिन्न स्थानमा छायांकन गर्नेछन् ।

Leave a Reply

Your email address will not be published.