काठमाडौँ, बिहिबार, ११ भाद्र २०७७ । स्वास्थ्य तथा जनसंख्या मन्त्री भानुभक्त ढकालले कोरोना भाइरस (कोभिड १९) रोकथाम तथा नियन्त्रणका सम्बन्धमा भईरहेको कामका सम्बन्धमा स्वास्थ्य क्षेत्रका विज्ञहरूसँग छलफल गर्नुभएको छ । बुधबार स्वास्थ्य तथा जनसंख्या मन्त्रालयका उच्चअधिकारीसहित मन्त्री ढकालले भर्चुवल माध्यमबाट स्वास्थ्य क्षेत्रका विज्ञहरूसँग छलफल गर्नुभएको हो ।

छलफलमा मन्त्री ढकालले सबैको प्रयासले नै कोरोना भाइरस (कोभिड १९) नियन्त्रणमा सफलता मिल्ने भन्दै निरन्तर सुझावको अपेक्षा राख्नुभयो । मन्त्री ढकालले कोरोना भाइरस (कोभिड १९) नियन्त्रणमा देखा परेका चुनाैतीको सामना सामूहिक प्रयासबाट गर्नुपर्ने बताउनुभयो । कोरोना विरूद्ध पहिलो भागमा राखेर खटिरहेका चिकित्स, नर्स, स्वास्थयकर्मी, सुरक्षाकर्मी, संचारकर्मी लगायतलाई धन्यवाद दिनुहुदैं सबैले उहाँहरूको हाैसला बढाउनुपर्ने बताउनुभयो ।

छलफलमा सहभागी हुँदै डा महेश मास्केले सूचना व्यवस्थापन राम्रोसँग गर्नुपर्ने बताउनुभयो । कोरोना संक्रमण नियन्त्रणभन्दा बाहिर नगएको भन्दै संक्रमितिको संख्या धेरै देखिए पनि संक्रमणको दर घट्दो क्रममा रहेको बताउनुभयो ।

कोरोना नियन्त्रणका लागि मन्त्रालयले गरेको प्रयास प्रभावकारी रहेको भन्दै सबैले सरकारको अभियानमा सहयाोग गर्नुपर्ने उहाँले बताउनुभयो ।

प्रा डा जीवन शेरचनले मास्क ठूलो मात्रामा उत्पादन गरेर जनतामा बितरण गर्नुपर्ने बताउनुभयो । कतिपय नागरिक मास्क किन्न सक्ने हैसियामा समेत नरहेको भन्दै उनीहरू पनि घरबाहिर निस्कनु पर्ने र काममा जानुपर्ने अवस्था रहेको भन्दै मास्क सरकारले नि:शुल्क बितरणको व्यवस्था मिलाउनुपर्ने बताउनुभयो । नमुना परीक्षणको नतिजा अझै छिटो र व्यवस्थित रूपमा दिनुपर्ने उहाँले बताउनुभयो ।

छलफलमा सहभागी नेपाल मेडिकल काउन्सिलका अध्यक्ष समेत रहेका प्रा डा भगवना कोइरालालले दशै लगायतका महत्वपूर्ण चाड नजिकै आइसकेको सन्दर्भमा प्रोटोकल बनाएर नागरिकहरूलाई सहजिकरण गर्नुपर्ने बताउनुभयो । अस्पताल संक्रमण रोकथामको काम गर्दै प्लाज्मा थेरापीका लागि प्लाज्मा बैंक बनाउनुपर्नेमा जोड दिनुभयो ।

छलफलमा नेपाल चिकित्सक संघका अध्यक्ष लोचन कार्कीले स्वास्थ्यकर्मीको सुरक्षाको सवालमा अलिबढी ध्यान दिनुपर्ने बताउनुभयो । टेकु अस्पतालका अस्पताल डा अनुप बास्तोलाले भेन्टिलेटरमा जाने भन्दा पनि अक्सिजन थेरापीलाई महत्वका साथ अघि बढाउनुपर्ने बताउनुभयो । अक्सिजन थेरामी भेन्टिलेटरभन्दा राम्रो र प्रभावकारी रहेको उहाँले बताउनुभयो ।

छलफलमा स्वास्थ्य मन्त्रालयकाका तर्फबाट सचिव लक्ष्मण अर्याल, मन्त्रीका सल्लाहकार डा खेमबहादुर कार्की, सह-सचिव डा गुणराज लोहनी, प्रवक्ता प्रा डा जागेश्वर गाैतम, डा गुणनीधि शर्मा लगायत सहभागी हुनुहुन्थ्यो ।

LEAVE A REPLY

Please enter your comment!
Please enter your name here