काठमाडौँ, मंगलबार, २९ माघ २०८१ । गोरखापत्र संस्थानका महाप्रबन्धक लालबहादुर ऐरीले गोरखापत्र राज्यको मिडियाको रुपमा विकसित हुनुपर्ने बताउनुभएको छ । प्रेस चौतारी नेपाल गोरखापत्र प्रतिष्ठान शाखाको सोमबार आयोजित पाँचौ अधिवेशनको समुद्घाटन समारोहमा उहाँले सो कुरा बताउनुभएको हो ।
महाप्रबन्धक ऐरीले भन्नुभयो, “गोरखापत्र राज्यको मिडिया हो । गोरखापत्र खोजेर होइन, बजारमा प्रतिस्पर्धी भएर जानुपर्छ । राज्यको मिडियाको रुपमा गोरखापत्र विकसित हुनुपर्छ ।”
उहाँले व्यावसायिक पत्रकारितालाई बढी जोड दिनुपर्ने भन्नुहुँदै थप्नुभयो, “गोरखापत्र व्यावसायिक रुपमा आफूलाई अब्बल बनाएको छ ।” उहाँले एकसय २४ वर्षको गौरवमय इतिहास बोकेको संस्थानलाई रि–ब्राण्डिङ गर्न आवश्यक रहेको धारणा राख्नुभयो ।
कार्यक्रमको उद्घाटन सत्रमा प्रेस चौतारी नेपालका सचिव हरिवल्लभ नेपालले गोरखापत्र नेपाली पत्रकारिताको विश्वविद्यालय भएको भन्दै गोरखापत्रले धेरै व्यावसायिक पत्रकार जन्माएको बताउनुभयो ।
कार्यक्रममा प्रेस चौतारी गोरखापत्र पत्रकारिता पुरस्कारद्वारा फोटो पत्रकार शेखर चौलागाई र ‘दि राइजिङ नेपालका सहसम्पादक डा. लीलाधर उपाध्यायलाई सम्मानित गरिएको छ । कार्यक्रममा गोरखापत्र दैनिकका सम्पादक शिवकुमार भट्टराई, दि राइजिङ नेपालका प्रधान सम्पादक भिमसेन थपलिया, सञ्चालक समितिका सदस्य राजुकुमार महत, प्रेस चौतारी नेपालका सचिव हरिवल्लभ नेपाल लगायतले शुभकामना मन्तव्य व्यक्त गर्नुभयो ।
यसैगरी, गोरखापत्र दैनिकका प्रबन्ध सम्पादक रामप्रसाद आचार्य, प्रेस सेन्टरका अध्यक्ष सुजन गुरुङ, प्रेस चोतारी नेपाल गोरखापत्र शाखाका सल्लाहकारहरु केपी गौतम, लक्की चौधरी, अजय शर्मा, प्रेस चौतारी नेपालका केन्द्रीय सदस्य केशबराज पौडेल, पूर्व केन्द्रीय सदस्य कविता थापा लगायतको सहभागिता थियो । शाखाको उदघाटनसत्र अध्यक्ष नगेन्द्र सापकोटाको सभापतित्वमा सम्पन्न भएको थियो ।
