गोरखा, आइतबार, २९ भाद्र २०८२ । गोरखाको पालुङ्टार नगरपालिका भित्रका सबै विद्यालय आज आईतबारबाट नियमित सञ्चालन हुने भएको छ ।
जेन-जी पुस्ताले सञ्चालन गरेको आन्दोलनका कारण पालुङटार नगरपालिकाभित्र असुरक्षा र अन्योल सिर्जना भएको भन्दै गत भदौ २४ गतेदेखि सबै विद्यालय बन्द गरिएको थियो । तर, अब अवस्था सामान्य भइसकेको भन्दै नगरपालिकाले बिद्यालय सञ्चालन हुनेगरी नगरपालिकाले सूचना समेत जारी गरेकाे छ ।
नगरपालिकाको निर्णयअनुसार आगामी भदौ २९ गते आइतबारदेखि नगरभित्रका सबै शैक्षिक संस्थाहरू नियमित रूपमा सञ्चालन हुने अध्यक्ष विवस चिन्तनले जानकारी दिनुभयो ।
यसअघि आन्दोलनका कारण विद्यालय क्षेत्रमा पठनपाठन अवरुद्ध भएको भन्दै पालुङटार नगरपालिकाले सुरक्षा दृष्टिकोणले विद्यालय बन्द गर्ने निर्णय गरेको थियो । अब भने शान्त वातावरण कायम भइसकेकाले विद्यालयहरू पुनः सञ्चालनमा आउने उहाँले जानकारी दिनुभयो ।
