गत बिहिबार घटस्थापनादेखि २०८१ सालको बडादशैं आरम्भ भयो । दशैं आरम्भ भएदेखि नै गाउँ सहरमा चहलपहल हर्ष, उमंग सुरु भएको छ । पढ्न तथा जागिरका क्रममा देश, विदेश रहेकाहरु घर फर्कन सुरु गरिसकेका छन् । अनि पर्व मनाउने प्रयोजनका लागि सरसामान किनमेल गर्नेको घुइँचो लाग्न थालेको छ ।
समूह मिलेर गाउँघर, सहरबजार सरसफाइ गर्न थालेका छन् । लामो समयदेखि नभेटिएका साथीसंगी भेटघाट गर्ने, रमाइलो गर्ने सिजन सुरु भएको छ । कलेज, विद्यालयहरु बिदा भएका छन् । कार्यालयहरु पनि क्रमश विदा हुँदैछ । विदा नभए पनि विदा लिएर घर फर्कने क्रम सुरु भएको छ ।
त्यसैले, दशैं हिन्दू धर्मावलम्बीहरुको महान पर्व भए पनि माहोलले गर्दा के हिन्दू, के वौद्ध, के मुस्लिम अनि के क्रिस्चियन सबै यो माहोलबाट अछुतो रहन सकेका छैनन् । हिन्दू बाहुल्य भएकाले जताततै रमझम छ । अनि फरक धर्मावलम्बीहरुलाई पनि चाहेर, नचाहेर यो वातावरणले छोइहाल्छ, रमझमको सदस्य बनिहाल्छन् । त्यसैले दशैंलाई नेपालीहरुको महानपर्व भन्ने भाष्य निर्माण भएको छ ।
सुख र खुशी फैलनु सबका लागि सुखद पक्ष हो त्यसैले सबैले यो समय धुमधामले मनाउन् । अशान्ति, तनाब, खिचातानीलाई बिर्सेर दशैं सुखपुर्वक, खुशीपूर्वक, आनन्दपूर्वक, तनाबरहित भएर मनाउन् । दशैंका बेला अत्याधिक मादक पदार्थ सेवन गरी झै झगडा गर्ने सम्भावना पनि रहन्छ ।
मादक पदार्थ सेवन गरी सवारी चलाई दुर्घटना गराउने सम्भावना पनि रहन्छ । रामरमितामा भुल्दा चोरीको सम्भावना पनि रहन्छ । अत्याधिक खानेकुरा खाँदा बिरामी हुने सम्भावना पनि रहन्छ । तसर्थ उपरोक्त सबै कुरालाई मध्यनजर गरी सावधान, सचेत, सतर्क भई सुख, शान्तिपूर्वक दशैँ मनाउनु पर्छ । सबैलाई सुख, शान्ति, संवृद्धि, सुस्वास्थ्य, दीर्घजीवनका लागि हार्दिक मंगलमय शुभकामना ।
