गोरखा, बिहिबार, ३ माघ २०८१ । उत्तरी गोरखास्थित धार्चे गाउँपालिकाको संस्थागत क्षमता स्वमूल्याकंन अंक बढेको छ । विगत दुई बर्षदेखि अंक बढ्दो क्रममा रहेको संघिय मामिला तथा सामान्य प्रशासन मन्त्रालयले प्रकाशन गरेको स्थानीय तहहरुको क्षमता स्वमूल्याकंन नतिजामा उल्लेख छ ।
गत आर्थिक बर्ष २०८०/८१ मा धार्चेको संस्थागत क्षमता स्वमूल्याकंन अंक ९४.७५ प्रतिशत रहेको छ । आव २०७९÷८० मा ७५.७५ प्रतिशत अंक प्राप्त गरेको धार्चेले आव २०७८/७९ मा ४३.५ प्रतिशत मात्र अंक प्राप्त गरेको थियो ।
हरेक वर्ष संघिय मामिला तथा सामान्य प्रशासन मन्त्रालयले स्थानीय तहहरुको संस्थागत क्षमता स्वमूल्याकंन नतिजा प्रकाशन गर्ने गरेको छ । विभिन्न १० सूचक (शासकिय प्रबन्ध, संगठन तथा प्रशासन, वार्षिक बजेट तथा योजना व्यवस्थापन, वित्तीय एवं आर्थिक व्यवस्थापन, सेवा प्रवाह, न्यायिक कार्य सम्पादन, भौतिक पूर्वाधार, सामाजिक समावेशीकरण, वातावरण संरक्षण तथा विपद व्यवस्थापन, सहकार्य र समन्वय) र १०० उपसूचकका आधारमा स्थानीय तहहरुको संस्थागत क्षमता स्वमूल्याकंन गर्ने गरिन्छ ।
स्वमूल्याकंनमा धार्चे गाउँपालिकाले दश सूचकमध्ये शासकिय प्रबन्धतर्फ शत प्रतिशत (१०० प्रतिशत) अंक प्राप्त गरेको छ । संगठन तथा प्रशासन तर्फपनि उक्त पालिकाले पूर्णाङ्क प्राप्त गरेको छ । पालिकाको वार्षिक बजेट तथा योजना व्यवस्थापन र वित्तीय एवं आर्थिक व्यवस्थापनतर्फको अंक क्रमश ९५.५४ र १०० रहेको तथ्याङ्कमा उल्लेख छ ।
सेवा प्रवाह तर्फ पालिकाले ९३.७५ प्रतिशत अंक प्राप्त गरेको छ भने न्यायिक कार्य सम्पादनतर्फ शत प्रतिशत अंक प्राप्त गरेको छ । यस्तै, पालिकाले भौतिक पूर्वाधार तर्फ ८८.४६ र सामाजिक समावेशीकरण तर्फ ९० प्रतिशत अंक प्राप्त गरेको नतिजामा उल्लेख छ । वातावरण संरक्षण तथा विपद व्यवस्थापन तर्फ ८८.८९ प्रतिशत र सहकार्य र समन्वयतर्फ ९५.८३ प्रतिशत अंक प्राप्त गरेको बताइएको छ ।
पालिकाले १० वटै क्षेत्रका सूचकहरुको आधारमा काम गरेकाले नै उत्कृष्ट अंक प्राप्त गरेको धार्चेको प्रमुख प्रशासकिय अधिकृत काजीमान सुनारले बताए । ‘निर्धारित सूचकहरुका आधारमा काम गर्ने र आफूले गरेका कामहरु सिस्टममा अपडेट गर्ने कामलाई महत्व दिएर गरेकाले नै विगतमा भन्दा यो वर्ष राम्रो नतिजा आएको हो’, उनले भने ।
