गोरखा, आइतबार, ४ फागुन २०८१ । गोरखामा चलिरहेका योजनामध्य सबैभन्दा ठूलो मानिएको पन्थडिही, कटहरे, हर्मी, साहिँलटार सडक स्तरोन्नति गर्ने कामको ४९ प्रतिशत प्रगति भएको छ । ८१ करोड ६० लाख रुपैयाँ लागतमा २० किलोमिटर सडक कालोपत्रे गर्ने काम धमाधम अघि बढिरहेको कार्यान्वयन गर्ने निकाय गोरखा सडक योजना कार्यालयले जनाएको छ ।
अहिलेसम्म १९ किलोमिटर सडकसम्म कटिङको काम गरिसकिएको योजना प्रमुख अमिन्द्र खड्काले जानकारी दिए । ‘१९ किलोमिटरसम्म नालीसहित ९.५ मिटर चौडा बढाउने काम सकिएको छ’, खड्काले भने, ‘६० वटा क्रस ड्रेन(कल्भर्ट) निर्माण भइसकेको छ । १३ किलोमिटर पक्की नाली निर्माणको काम पनि भइसकेको छ ।’ भौतिक प्रगति ४९ प्रतिशत र वित्तीय प्रगति ४३ प्रतिशत भएको उनले बताए ।
भारतीय एक्जिम वैंकको ऋण सहयोगमा सो सडक स्तरोन्नतिको आयोजनाको काम बढाइएको हो । सो सडक कालोपत्रेका लागि उडहिल, लामा जेभीले जिम्मा लिएको छ । आउँदो भदौ मसान्तभित्र कालोपत्रे गरिसक्ने गरी २०७९ फागुन १५ गते योजना सम्झौता भएको हो । सो सडक कालोपत्रे गर्ने कार्यको २०७९ चैत ८ गते तत्कालीन प्रधानमन्त्री पुष्पकमल दाहालले सिलान्यास गरेका थिए ।
सडकको ट्रयाक खन्ने काम भने बाबुराम भट्टराई अर्थमन्त्री तथा हिसिला यमी भौतिक पूर्वाधार मन्त्री हिसिला यमी हुँदा सुरु गरिएको थियो । सो सडक आसपास घर भएका पूर्व प्रधानमन्त्री भट्टराईले त्यसयता सो सडक स्तरोन्नतिका लागि ताकेता गरिरहेका थिए । भारतीय एक्जिम वैंकमार्फत स्तरोन्नति गर्ने गरी स्रोत सुनिश्चित पनि गरेका थिए ।
२०७७/०७८ र ०७८/०७९ मा लगातार दुईपटक ठेक्का आह्वान गर्दापनि यो सडक स्तरोन्नतिको काम सुरु हुन सकेको थिएन ।अहिले कामको गति हेर्दा निर्धारित समयमा निर्माण सम्पन्न हुने पूर्वअनुमान गर्न सकिन्छ, तर बर्सातको समयमा काम अपेक्षित रुपमा अघि बढ्न नसक्ने हुँदा केही लम्बिन पनि सक्ने योजना प्रमुख खड्काले बताए ।
