गोरखा, मंगलबार, १० असार २०८२ । गोरखाको भिमसेनथापा गाउँपालिकाको आगामी आर्थिक वर्ष २०८२/८३ को बजेट ६१ करोड ३२ लाख रहेका छ । सोमबार भएको गाउँसभाको १६ औँ अधिवेशनमा पालिकाकी उपाध्यक्ष अमृतादेवी वस्ती भट्टले उक्त बजेट प्रस्तुत गरेकी हुन् । यस्तै, पालिकाका प्रमुख लोक प्रसाद बञ्जराले नीति तथा कार्यक्रम प्रस्तुत गरेका छन् ।
आगामि आर्थिक वर्षदेखि पालिकाले जाँड, रक्सी, वाइन जस्ता घरेलु मदिराको स्तर निर्धारण (लेभलिङ) गरी ब्राण्डिङ तथा बजारीकरण गर्ने नीति तय गरेको छ । साथै, घरेलु मदिरा उत्पादनका लागी आवश्यक कोदो खेतीलाई प्रोत्साहन गर्ने गरी उत्पादनका आधारमा अनुदान दिने नीति पालिकाको छ । कृषि उत्पादन बृद्धिका लागी मोबाइल घुम्ति शिविरबाट माटो परिक्षण गर्ने व्यवस्था मिलाउने नीति पालिकाको छ ।
यस्तै, ‘एक वडा एक उत्पादन पकेट क्षेत्र’ कार्यक्रम लागु गरी कार्यक्रमको विकास तथा बिस्तार गर्ने योजना पालिकाको छ । गाउँपालिकाभित्र विषादीको प्रयोग न्युनिकरण गरी प्राङ्गारिक खेतीलाई प्रोत्साहन गर्ने पालिकाको योजना छ । आगामी वर्ष भौगोलिक हावापानी र माटो सुहाउँदो तरकारी बाली, फलफुल, खाद्यन्न, नगदे बाली प्रवद्र्धन कार्यक्रममा विशेष प्राथमिकता दिइने उल्लेख छ ।
कृषि क्षेत्रको विकासका लागी ‘कृषकको कारीमै कृषि प्रविधि’, ‘एक घर, एक मौरी कार्यक्रम’ जस्ता विभिन्न नारासहितको कार्यक्रमहरु संचालन गर्ने उदेश्य पालिकाको छ । यस्तै, कृषि उपज संकलन केन्द्र, हाटबजार, कृषि भण्डारण र शीत भण्डारण निर्माण तथा संचालन गर्ने, आगामी चार वर्षमा पालिकालाई फलफुल, तरकारी र खाद्यन्नमा आत्मर्निभर बनाउने, पालिका स्तरीय नर्सरी स्थापना गर्ने र महिलामैत्री कृषि उपकरण प्रयोगमा ल्याई महिलाहरुलाई कृषिमार्फत आर्थिक सशक्तिकरणमा लगिने नीति पालिकाले ल्याएको छ ।
पशुहरुमा लाग्ने विभिन्न रोगको नियन्त्रण र रोकथामका लागी आवश्यक व्यवस्था मिलाउने नीति पालिकाको छ । समूहगत वा एकल पशुपालन गर्ने उत्कृष्ट कृषकलाई पुरस्कृत गरिने, पशुजन्य उत्पादनमा आधारित अनुदान योजना कार्यन्वयन गर्ने र बाख्रा तथा भैँसीको पकेट क्षेत्र निर्माण गरी आवश्यक माउ, प्रविधि र व्याडको व्यवस्था गर्ने योजना पालिकाको छ । साथै, गाउँपालिकामा मध्यपहाडी लोकमार्ग दुग्ध कोरिडोरको रुपमा र सिँगै पालिकालाई बाख्रा पकेटको रुपमा विकास गर्ने पालिकाको नीति तथा कार्यक्रममा भनिएको छ ।
पालिकाभित्रको सम्भाव्य पर्यटकीय क्षेत्रहरुको पहिचान गरी त्यसको वृहत्तर एवं एकीकृत विकासको वृत्तचित्र तयार गर्ने बताइएको छ । गाउँमा होमस्टे प्रवद्र्धन गरी युवालाई सामुदायिक पर्यटनमा आकर्षित गरी आर्थिक विकास र मौलिक संस्कृति संरक्षणमा जोड दिने लक्ष्य पालिकाको छ । एक वडा एक पर्यटकीय स्थल र अन्तरवडा पर्यटकीय सञ्जालको विकास गर्ने बताइएको छ ।
कृषि योग्य जमिनमा प्लटिङ गरी आवास निर्माण गर्ने कार्यलाई निरुत्साहित गर्ने पालिकाको नीति तथा कार्यक्रममा उल्लेख छ । सहकारी क्षेत्रमा देखिएको समस्या समाधानका लागी आवश्यक नीति बनाउने र सहकारी संस्थाको सुरक्षाका लागी गाउँपालिकाबाट नै सुरक्षा नीति बनाई लागू गर्ने पालिकाको नीति तथा कार्यक्रममा उल्लेख छ ।
पालिका अन्तरगतका विद्यालयहरुमा स्वच्छ खानेपानीको व्यवस्था, प्लाष्टिक तथा जंक फुड पूर्ण रुपमा निषेधित क्षेत्र घोषणा अपाङ्गता तथा बालमैत्री विद्यालय निर्माण तथा एक विद्यालय एक बगैँचा र करेसाबारी कार्यक्रमलाई निरन्तरता दिने नीति पालिकाको छ । पालिकाले आगामी आव मेघा विद्यालय गर्न विद्यालय नक्साङ्कन, विद्यालय समायोजन तथा दरबन्दी मिलान कार्यक्रमलाई कायम गर्ने योजना पालिकाको छ । शिक्षामा झिकाउ, सिकाउ, टिकाउ र बिकाउको नीति पालिकाको छ ।
