काठमाडौँ, बिहीबार, १३ कात्तिक २०८२ । जापान सरकारले बाढीबाट प्रभावित सिन्धुली सडकको आपत्कालीन पुनर्निर्माणको लागि २.६ अर्ब रुपैयाँ अनुदान सहयोग गर्ने भएको छ । उक्त सहयोग नेपाललाई गर्ने सम्बन्धमा बिहीबार दुई देशका अधिकारीहरूबीच एक समझदारीपत्रमा हस्ताक्षर भएको छ ।
अर्थमन्त्री रामेश्वर खनाल र गृहमन्त्री ओमप्रकाश अर्यालको उपस्थितिमा दुई देशका अधिकारीले हस्ताक्षर गरेका थिए ।
नेपालका लागि जापानका राजदूत मैदा तोरु र अर्थ मन्त्रालयका सचिव घनश्याम उपाध्यायले अनुदानको लागि नोट आदानप्रदानमा हस्ताक्षर गरेका थिए ।
सिन्धुली सडक १६० किलोमिटर लामो छ । यसले मध्य र पूर्वी तराईलाई राजधानी काठमाडौंसँग जोड्छ । यसको निर्माण सन् १९९५ देखि २०१५ सम्म जापानी अनुदान सहयोग (२५.८ अर्ब येन) मा भएको थियो ।
यस सडकले नेपालको आर्थिक वृद्धिमा योगदान पुर्याएको विश्वास काठमाडौंस्थित जापानी दूतावासले बिहीबार जारी विज्ञप्तिमा उल्लेख छ ।
सेप्टेम्बर २०२४ मा निरन्तर भारी वर्षाका कारण आएको बाढीले सिन्धुली सडकमा क्षति पुर्याएको थियो । बाढीले १० किलोमिटरभन्दा बढी सडक बगाएको थियो ।
यो परियोजना नेपालको लागि दिगो आर्थिक विकास हासिल गर्न र जापान र नेपाल बीचको सौहार्दपूर्ण सम्बन्धलाई अझ मजबुत बनाउन महत्त्वपूर्ण भूमिका खेल्ने विश्वास जापानी दूतावासले व्यक्त गरेको छ ।
