काठमाडौँ, बुधबार, ७ जेठ २०८२ । नेपाल राष्ट्र बैंकका नवनियुक्त गभर्नर डा. विश्वनाथ पौडेलले पदभार ग्रहण गर्नुभएको छ ।
पदभार ग्रहणपछि नवनियुक्त गभर्नर पौडेलले पाँच सय र एक हजारका नयाँ नोट छपाई गर्ने निर्णयमा हस्ताक्षर गर्नुभएको थियो । पदभार ग्रहणपछि प्रतिक्रिया दिँदै उहाँले मौद्रिक नीति र वित्त नीति अलग विषय रहेको बताउनु भयो । मौद्रिक नीतिले सरकारको वित्त नीति कार्यान्वयनमा केही अवरोध गरेको भए परिमार्जन गर्दै जाने उहाँले बताउनु भयो ।
उहाँले पहिलो काम मौद्रिक नीतिले तय गरेका विषयहरुलाई सफल बनाउनेतर्फ र अर्को काम सुपरीवेक्षण बढाउने भएको स्पष्ट पार्नुभयो । नेपालका विभिन्न बैंकहरुमा सर्वसाधारणका धेरै पैसा बसेका र तिनीहरुको सुरक्षाका लागि सुपरीवेक्षण प्राथमिकतामा पर्ने उहाँको भनाइ थियो ।
उहाँले भन्नुभयो, ‘राष्ट्र बैंकको भुमिका महत्वपूर्ण छ सबैलाई थाहा नै छ । हामी दुईटा कुरालाई फोकस गर्छौं । एउटा मौद्रिक नीतिले तय गर्छ यसलाई सफल बनाउनका लागि र अर्को सुपरीवेक्षण नै हो । धेरै नियम बनाएर काम देखिँदैन त्यसैले सुपरीवेक्षणलाई बढाउँ भन्ने छ । बैंकको क्षमता बढाउने हो त्यसमाथि बैंकको मेजर काम सबैलाई थाहै छ । विभिन्न बैंकमा सर्वसाधारणका पैसा बसेका छन्, तिनीहरुको सुरक्षा गर्ने । ल्याण्डिङ पोलिसि राम्रो ल्याउने हो । ल्याण्डिङ पोलिसिहरु पोलिसीहरुको प्रयोग राम्रोसँग भएको छ छैन भनेर अनुगमन गर्ने । निरन्तर मूल्यांकन गर्नेलगायतका कार्यहरु प्राथमिकतामा छन् । त्यसैगरी मौद्रिक नीतिले तय गरेका कामहरु सम्पन्न गर्नु नै मुख्य उद्देश्य हुन्छ । अर्को चाहीँ भनेको सुपरीवेक्षणमा नै फोकस हुन्छ । मैले पोलिसी मेकिङ सधैं सम्भावनारहित हुनुपर्छ भनेको छु । हाम्रो देशमा धेरै स्टेक होल्डरहरु छन् । सुरुमा म आफैं सोलुशन ल्याएर यसैलाई गरौं भन्ने पक्षमा पनि छैन । सबैलाई मैले के भनेको छु भने एकदिन अगाडि मौद्रिक नीति ल्याएर यसैमा सबैलाई जबरजस्ती गराउने हैन । नीतिका विषयमा सम्बन्धित पक्षहरुसँग छलफल नै गर्छु पहिला । त्यसको आधारमा मौद्रिक नीति तय हुन्छ । त्यसैले सबैले राम्रो सोच्नुपर्ने हुन्छ । हामीले अहिले दिएका अधिकारहरु प्रयोग गर्ने हो र ऐनअनुसार काम गर्ने हो । दिएका अधिकारहरु प्रयोग गरेरै काम गर्ने हो त्यसका लागि नेपाल राष्ट्र बैंकका सम्पूर्ण कर्मचारीको एकमत रहन्छ ।’
उहाँले गभर्नरका अर्का आकांक्षी राष्ट्र बैंकका कार्यकारी निर्देशक गुणाकर भट्टको राजीनमा अस्वीकृत हुनु आन्तरिक कुरा भएको बताउनु भयो ।
